Meghalaya : Scindia-a'n DoNER project Rs tld 2.33 man hu hawng

Union minister for communication and development of north eastern region, Jyotiraditya M. Scindia chuan Meghalaya-ah Prime Ministers' Development Initiative for North Eastern Region (PM-DevINE) scheme hnuaia thawh tur, Integrated Sohra Circuit Development lungphum a phum a, DoNER project Rs tld 2.33 hu thawhna tur a hawng bawk. He hunah hian chief minister Conrad K Sangma, senior official-te leh stakeholder-te an tel.

Inrinni liam taa hawnna inkhawma thu a sawiah, Scindia chuan Meghalaya chu hmun nuam leh mawi tak a ni tiin sorkar laipui chuan hmarchhak biala tourism-in hma a sawn zel theihna turin theihtawp a chhuah chhunzawm zel dawn tih a sawi.

Minister chuan prime minister Narendra Modi kaihhruaina hnuaiah hmarchhak bialah hmasawnna leh inthlakdanglamna nasa tak a awm tawh tih a tarlang. Gross Budgetary Support policy 10% hmangin Rs tld 6.2 chuang helai bialah hian hman a ni tawh a ni tiin, Meghalaya chu a chhawr ṭangkai bertu niin, infrastructure, thlawhtheihna hmanga intlawhpawhna leh tourism-ah 12-16% in an ṭhanglian tawh tih a sawi.

Infrastructure project pawimawh zingah, Scindia chuan km 166.8-a thui Shillong-Silchar Greenfield Expressway Rs tld 228.6 man hu a tel thu a sawi a, Umroi Airport tihzauh a ni dawn tih a sawi bawk. Airport-ah hian thlawhtheihna lian zawk an service thei tawh dawn a, intlawhpawh a ti awlsam dawn a ni, a ti. Sorkar laipui leh state chuan Prime Minister kaihhruaina hnuaiah thawh hona ṭha an neih chhunzawm zel dawn tih a tarlang bawk.