Sikkim : Railway Ministry-in Rs vbc 8.48 sanction

Ministry of Railways chuan Sikkim-a Melli-Dentam rel kawng siamna tur Final Location Survey (FLS) atan Rs vbc 8.48 a pawm. Hei hi state ramri chhim leh khawthlang lam rel hmanga intlawhpawhna tihhmasawnna atana hma lakna tur a ni.

October 24-a Northeast Frontier Railway hnena official communication tihchhuahah, pawisa sanction chu Melli, Jorethang, Legship, leh Dentam kaltlanga kilometre 75-a thui rel kawng siamna tur FLS kalpuina atan hman a ni ang. Lok Sabha MP Indra Hang Subba chuan tun hnai khan union railway minister, Ashwini Vaishnaw hnenah hna thawh thuai a nih theihna tur hian a lo ngen tawh a ni.

Subba chuan FLS hi Melli-Dentam railway project atan thil pawimawh tak niin, zawhfel a nih hunah chuan West Sikkim-a hmun hla leh tlawhpawh harsate tan pawh hmasawnna a awm thei dawn tih a sawi. Subba hian kumin July 25 khan Railway Minister hmuin; FLS, Detailed Project Report (DPR) project kalpui dan tur chungchangah hma laksak turin a lo ti tawh a ni.

MP chuan union minister Vaishnaw, chief minister Prem Singh Tamang leh governor Om Prakash Mathur-te thlawpna avangin lawmthu a sawi a, Chief Minister kaihhruaina leh sorkar laipuiin sanction ti chhuak tura hma a lak zuinaah lawmthu a sawi bawk.