Manipur : UKNA member pali kaphlum

Manipur-a Churachandpur district-ah United Kuki National Army (UKNA) member palite chu nimin, Thawhlehni zinga security force-te nen an inkahnaah kahhlum an ni tih defence thupuangtu chuan a sawi. Beihpui thlakna hi kalpui chhunzawm zel a nih bakah, Churachandpur district aṭanga km 80 vela hla, Khanpi khaw bul hmun hrang hrang dap mek a nih thu thupuangtu chuan a sawi bawk.

Tun hnaia sorkar laipui, state sorkar leh Kuki, Zomi leh Hmar hnam zinga hel pawl 24 ten inkahhai puanna, a suspension of operations (SoO) agreement an siam tharah UKNA hi an tel ve lo a ni.

Sipaiten beihpui an thlak lai hian helpawlte chuan Churachandpur chhim lam, km 80 vela hlaa Khanpi khuaah sipai column chu kapin, hemi hnua security force leh UKNA-a silai keng cadre-te chu silaiin an inkah chhunzawm a, cadre palite chu kahhlum an ni tih thupuangtu chuan a sawi.

UKNA helpawl member 17-te chu Khanpi khuaa in pakhatah man an ni a, pakhat chu man niin, ṭhenkhat an tlanchhe bawk a ni. Helpawl zinga an kahhlum mi palite chu helicopter hmangin an ruang hi district hospital-ah lak an ni.