Assam: Minister-in Advantage Assam 2.0 kalpui dan ennawn

Assam industries, commerce leh cultural affairs minister Bimal Borah chuan Advantage Assam 2.0 neih ṭuma memorandum of Understanding (MoU) an ziah tawh a hmalakna leh an kalpui dan a ennawn. Inremna an siam hmanga state puma hmasawnna hna thawh an kalpui dante a endik bawk.

Minister chuan review meeting hi Cachar district commissioner office-ah Pathianni khan a kaihruai a, Cachar leh district danga project pawimawh leh lian tham thawh mek dan a enfiah. District thuneitute chu an hnathawhah fakin, sorkar hmathlir nena inmilin hna an thawk tih a sawi.

Advantage Assam 2.0-a MoU an ziahte chu document naran mai ni loin, hmasawnna a taka hmuh theih tura hmalakna a ni tih a sawi. Project lian tham thawh zingah, Medanta Super Speciality Hospital, Cocoon Mother and Childcare Hospital bakah, Lemon Tree Premier Hotel-te chu Assam healthcare leh hospitality sector tana pawimawh tak an nih thu a tarlang. Hei bakah PepsiCo tan Rs vbc 700 invest a ni tih a tarlang bawk.

Assam-a sumdawnna kalpui dan pawh thlak danglam mek a ni tih sawiin, ram chhung leh ram pawn aṭangin investment kalpui a nih thu Borah chuan a sawi. Sorkarin industry chauh a ngai pawimawh bik lo tih sawiin, hmasawnna chuan mitin hnen a thleng dawn tih a tarlang.

Meeting-ah hian Minister chuan official-te chu inpe zo tak leh rim taka hna thawk turin a chah a, mipui huapzo hmasawnna a awm theihna tura hma la turin a ngen bawk. Mipui vantlang nena inzawmna tihchak a nih chuan, Assam pawhin hma a sawn zel dawn a ni, a ti.