Assam: PM-in LGBI Airport terminal thar hawng dawn

Prime minister Narendra Modi chuan Guwahati-a Lokpriya Gopinath Bordoloi International (LGBI) Airport terminal thar a hawng dawn a, Namrup-a Rs vbc 10,601 senna tur, Ammonia-Urea complex sakna tur lungphum a phum bawk ang.

Chief minister Himanta Biswa Sarma chuan Thawhlehni khan New Delhi-ah Prime Minister hmuin airport terminal thar hawng tur leh, fertiliser plant thar tur lungphum phum turin a sawm tih Chief Minister Office thuchhuah chuan a tarlang a, PM hian an sawmna hi a lo pawm a ni.

Guwahati-a LGBI Airport terminal thar hi hmarchhak biala thlawhtheihna hmanga intlawhpawh tawnna tihchangtlunna tur leh, passenger tam zawk an awm theihna tura duan a ni. Hman ṭan a nih hunah chuan kumtin passenger vbc 1.3 vel a dawngsawng thei dawn a, thlawhtheihna hmanga zinte indaih loh ṭhinna a tihziaawm dawn bakah, Guwahati chu hmachhak bial tana aviation hub pawimawh tak a nih theih phah dawn a ni.

Terminal thar hi hmanraw tunlai ber hmanga thuamin, baggage handling system bakah passenger facility tihchangtlun a ni bawk a, India hmar lama airport infrastructure changtlung ber pawl a ni dawn a ni. Official-te chuan tourism leh sumdawnna tihchakna atan hmun pawimawh tak a ni dawn tih an sawi.

Namrup-a Ammonia-Urea complex pawh peihfel a nih hunah hmarchhak biala loneitute hnena fertiliser supply ṭha zawka pekchhuahna atan a ṭangkai dawn hle. He project hian hmarchhak bial thlai tam zawk thar chhuahna kawngah a pui thei dawn nia ngaih a ni.