Assam : Sorkar laipui hruaituten state tlawh dawn

Assam chief minister Himanta Biswa Sarma chuan union finance minister Nirmala Sitharaman leh defence minister Rajnath Singh-ten November 7 leh 9 inkarah, project liam tham eng emaw zat lungphum phum turin leh hawng turin an state an tlawh dawn tih a puang.

Chief Minister chuan Sitharaman hian nimin, November 7 khan ni hnih cham turin Assam a thleng tih sawiin, Jagiroad-a semiconductor plant thar a endik dawn a, infrastructure project pawimawh tak tak a hawng dawn tih a sawi. Vawiin hian Kanaklata Barua State University sakna tur lungphum a phum dawn tih a sawi bawk.

Defence minister Rajnath Singh chuan November 9-ah Indian Air Force aero show, Lachit Ghat-a neih turah a telpui bawk dawn a ni.

Sarma chuan Prime Minister-in state a tlawh huna ruahmanna an siamte sawilangin, Modi chuan Guwahati leh Dibrugarh a tlawh dawn niin a sawi. Guwahati-ah hian Airport ternimal thar a hawng dawn a, Dibrugarh-ah Assam leh sorkar laipui thawh dunna fertiliser complex lungphum a phum bawk dawn a ni. Hemi hnu hian Guwahati-ah Guwahati leh North Guwahati thlunzawmna, Brahmaputra lui chunga lei dawh thar a hawng bawk ang.

Union home minister Amit Shah chu party meeting-a a tel dawn bakah, cultural project pahnih; Jyoti Prasad Agarwala leh Bishnu Prasad Rabha-te hriatrenga atana sak, mi 5,000 lenna auditorium a hawng dawn a, Mahapurush Srimanta Sankardeva pianna hmuna project eng emaw zat pawh a hawng dawn bawk.