Meghalaya : Assembly building thar nakkumah hmang ṭan dawn

Meghalaya-in hun rei tak a lo nghah tawh, Legislative Assembly building thar chu nakkum June 26-ah hman theih tura peihfel a ni dawn tih speaker Thomas A Sangma chuan Nilaini khan high-level review meeting neihah a puang. He hunah hian deputy chief minister in-charge of parliamentary affairs, Prestone Tynsong pawh a tel a ni.

Assembly building thar hi kumin March thlaa zawhfel tura ruahman a ni a, a chhunglam hna thawh tur pawimawh zingah main hall, reception area leh lobby-te khawih rei a ngaih dawn avangin thla ruk chhung pawhsei leh a ni. A hun taka zawhfel a nih theihna turin Sangma chuan review meeting thla tin neih a ni dawn tih a sawi. Meeting neih leh hun tur atan December 8 ruat a ni nghal bawk.

Sangma chuan nakkum favang session chu building tharah neih hman a ni dawn tih sawiin, audio visual system tunlai ber hman a ni a, acoustic changtlung leh venhimna pawh ṭha taka kalpui a ni dawn tih a tarlang.

Assembly complex hi phase hrang hranga sak niin, tun dinhmunah a thawh hnihna atan Detailed Project Report (DPR) chu siam mek a ni a, heng zingah hian staff quarters leh thil pawimawh dangte a tel. State sorkar pawhin a kaihhnawih Central Ministry-te hnenah pawmpuina an mamawh angte a dil nghal bawk.