Sikkim : Gangtok-ah International Tourism Mart buatsaih dawn

Sikkim khawpui, Gangtok-ah International Tourism Mart (ITM) vawi 13-na chu November 13-16 thleng buatsaih a ni dawn. He hunah hian hmarchhak bial state tin aiawhte leh ram 18 aiwhte an tel dawn a ni.

Tourism minister T.T Bhutia chuan hmarchhak biala Chief Minister, Tourism Minister leh stakeholder-te bakah, ram pawn aṭangin mi 300 vel an tel dawn tih a sawi. ITM hi Sikkim Tourism leh Civil Aviation Department-ten Union Ministry of Tourism an thawhpuinaa buatsaih tur a ni.

Bhutia chuan tun ṭum ITM-ah chuan North Eastern Bazar telh a ni dawn tih sawiin, tualchhung entrepreneur-te tan platform pawimawh tak a ni dawn tih a sawi. Additional chief secretary C.S Rao chuan ram 18 aṭanga tel tur tihchian a ni tawh tih a sawi bawk.

Tourism secretary Neeraj Pradhan chuan, he hunah hian tualchhung leh khawvel market-ah inzawmna ṭha zawk a awm dawn tih tarlangin, ITM chuan tualchhung thil siamchhuah leh hmalaknate a chawikan phah dawn a ni, a ti. Ram pawn lam mite hnenah tualchhung stakeholder-te tan an hnathawh pholanna hun remchang a siam dawn a, khawvel pum huapin tourism lamah Sikkim a chawisang dawn tih a sawi.

ITM hi Union Ministry of Tourism chuan kumtin a buatsaih ṭhin a, hmarchhak bial tourism hmasawnna atana hun pawimawh tak a ni. Edition tinah tourism hmanga sumdawnna, sorkar agency, travel buyer, seller, leh media stakeholder-te tan thawh hona ṭha a siamsak ṭhin. Edition hmasa Kaziranga-a neihah ramsa leh eco-tourism chungchang thlurbing a ni a; kumin edition-ah chuan khawtlang kaihhruai tourism, tlangrama mikhual enkawlna pek leh, ramri kaltlanga zin veivah ngaih pawimawh a ni ang.