Nagaland : Sorkarin kum upate awmna tur sa dawn

Nagaland-a Social Welfare advisor Wangpang Konyak chuan Ningani khan thuchhuah siamin, state sorkarin district tinah kum upate awmna tur, old-age home a sa dawn tih a puang. He thu hi District Hospital, Mon-a kum upate tana Eye camp buatsaiha khuallian a nihnaah a sawi.

Programme hi Department of Social Welfare leh Mercy Eye Centre, Dimapur ṭangkawp buatsaih niin, District Hospital-in a thawhpui bawk. Konyak chuan kum upa lam, khaw hmuh fiah tawh lo siamṭhat sak tumna programme-a a tel thei chu lawmawm a tih thu sawiin, hetianga hmalakna hi kum upa zawkten ngaihsak an hlawh tih lantirna a ni, a ti. Social Welfare department chu dinhmun hniam zawkte leh, kum upa lamte hamṭhatna pe tura theihtawp chhuahtu an nih thu a sawi bawk.

Kum upate tana welfare scheme eng emaw zat tarlangin; Old Age Pension, Elderly Helpline leh Charity Care buatsaih a nih thu a sawi.Heng bakah hian district tinah kum upate awmna tur, Old-Age Home sak a nih tur thu hi a sawi bawk a ni.