Tripura : Sorkarin loneitu 6,000 ṭanpuina sum hlan dawn

Tripura-a alu thar chhuah tihpunna tura hmalakna lian tak hnuaiah, state sorkar chuan ARC (Aeroponic Rooted Cutting) hmangtu, loneitute chu sum leh hmanrua lamah ṭanpuina a pe dawn tih a puang.

Agriculture minister Ratan Lal Nath-a'n secretariat-a thuthar lakhawmtute a kawmnaah, state hmun hrang hranga loneitu 6,000 te chuan scheme hnuaiah ṭanpuina an dawng dawn tih a sawi. Loneitute chu an bank account-ah Rs 2,000 dah sak an ni dawn a, thlai chinna atana hmanrua an mamawh Rs 1,000 man hu pek an ni dawn bawk. He hmalakna atana sorkarin sum a sen tur hi Rs vbc 1.8 a tling.

Tun dinhmunah Tripura-a loneitu 23,700-te chuan alu an ching a, ram acre 47,341-ah an ching tih Minister chuan a sawi. Loneitute chuan ram square meter 1,300 vela zauah alu kg 2,500-3,000 an thar ṭhin a, ARC hman a nih hnuah kg 9,000 leh 10,000 thar chhuah a ni tawh tih Minister chuan a sawi.

ARC hi kum 2023 khan loneitu 100-te hnenah enchhin tir a ni a, hlawhtlinna nasa tak a awm avangin kum 2024 khan loneitu 400-ten an hmang tawh a ni. He an hlawhtlinna hmang hian sorkar chuan kuminah loneitu 4,000-te chu RKBY project hnuaiah ṭanpuina a pe dawn a, loneitu 2,000-te chu Watershed Management Project kaltlangin ṭanpui an ni bawk ang.

Minister Nath chuan he hmalakna hmang hian state-ah agriculture lamah hmasawnna nasa tak a awm dawn tih sawiin, an state chu alu tharchhuah kawnga intodelh turin a pui thei dawn a ni, a ti.