Manipur : Sorkarin PM-NAPS awareness campaign hawng

Manipur sorkar chuan Ningani khan hmarchhak bial tana buatsaih, Pradhan Mantri-National Apprenticeship Entrepreneurship Promotion Scheme (PM-NAPS) awareness campaign chu Imphal-ah a hawng.

He huna khuallian, additional chief secretary (textiles, commerce, industry leh transport), Anurag Bajpai chuan Skill India Mission hnuaia promotion scheme hi zirna, training leh industry-te platform thuhmuna dahna tur a nih thu a sawi. Manipur-ah hian industry 95-96% vel chu micro emaw small-scale emaw niin, sorkar chuan heng unit-te hi small leh medium enterprise-a thlak chu a ngaih pawimawh thu a sawi. Tualchhung industry leh hmaruate chawikan bakah, market zau zawka hralh chhuah a nih theihna tura hmalakna a ni tih a tarlang bawk.

Campaign hi sorkar laipui programme pawimawh tak niin, Bajpai chuan scheme hlawhtlinna atan tum pahnih an nei tih a sawi a, ṭhalaite zinga zirtirna pek leh Manipur mipui tam zawk an tel theihna tur ruahman a nih thu a sawi.