Hmarchhak state paliin Nirbhaya Fund hmang lo
Hmarchhak state zinga pali - Manipur, Meghalaya, Sikkim leh Tripura te chuan sorkar laipuiin Nirbhaya Fund a pek chu cheng khat mah an la hmang lo.
Ministry of Women and Child Development in tunhnaia report a tihchhuahah hei hi tarlan a ni. Heng state pali te tana home ministry-in Nirbhaya Fund hnuaia sum a pek hi cheng nuai 2934.09 a ni.
Hmarchhak state dang pali - Assam, Arunachal Pradesh, Mizoram leh Nagaland te pawhin Nirbhaya Fund an dawn hi tlem te chauh an la hmang hlawm niin report chuan a tarlang bawk. Kum 2019-a central-a Congress kaihhruai UPA sorkar laia siam, Nirbhaya Fund hi hmeichhiate himna tur atana hmalakna tura tih a ni. He fund hi kum 2012-a Delhi-a physiotherapist hmeichhe pakhat rapthlak taka pawngsual rawn leh thah a nih hnua din a ni. Pawngsual tawktu hi a huaisen em avangin media lamten a hming lemah 'Nirbhaya' (hlauh nei lo) tiin an phuahsak a, he hming hi thil dangah pawh hman chhunzawm a ni ta zel a ni.
Ministry report in a tarlan danin, home ministry in state leh union territory hrang hrangah Nirbhaya Fund hnuaia sum a pek zinga 90% chuang chu hman lohin a la awm.