CAB duh lohna lantirin AASU-in nawrh huaihawt dawn

All Assam Students’ Union (AASU) leh a thawhpui pawl dang 30-te chuan vawiin aṭang hian Assam state pumah Citizenship Amendment Bill dodalna lantirin, ni thum awh tur nawrh an huaihawt ṭan dawn. 

Zirlai pawl hian district leh region unit hruaitute zawng zawng hnenah pawh December 4, 5 leh 6 hian khaw tinah nawrh hi huaihawt turin an hriattir tih a sawi. Sorkar laipuiin CAB kalpui a tum hi Assam mite duhdan kalh a ni tiin, he bill dodalna kawngah state mipuite chu lungrual turin a ngen bawk. 

AASU president Dipanka Kumar Nath chuan dan loa Bangladesh mi lutte chu an vote duh vang maiin sorkar laipui  chuan khua leh tui nihna pek a tum a, a thang kamah hian Assam sorkar pawh a awk leh ta niin a sawi.  Assam Accord chuan Assam leilung fate leh an duhdante humhalh sak a tiam a, mahse CAB chuan hei hi a rawn palzut sak ta a ni, a ti. He bill hi eng kawng maha an pawm theih loh tur thu a sawi.