Manipur-ah heroin Rs vbc 165 hu man
Manipur-a Thoubal district-ah police leh 26 Assam Rifles ten joint operation an neihnaah ruihhlo sawngbawlna hmun chu hmuchhuakin, heroin cheng vaibelchhe 165 hu an man bakah, ruihhlo siamna hmanruate an man tel bawk.
Thoubal Superintendent of Police Ibomcha Singh chuan joint operation an neihnaah hian Sada Khumbi khuaa in pakhatah heroin hi an man tih sawiin, an ruihhlo man hi kg 40.61 zet a nih thu a sawi bawk. Police-te chuan drug laboratory a awm thu an dawn vangin dap turin an chhuak a, Ningkhangam Awungshi chenna in chu dapin, ip lian tak pahnihah heroin a dah hi an hmuchhuak a ni. An ruihhlo man hi international marker-ah cheng vaibelchhe 165.17 man a ni tih official-te chuan an sawi.
Ningkhangam thu an zawhfiahna atangin, police team pakhat chu a unaupa Wungreingam Awungshi inah tirh leh an ni a, hetah hian ruihhlo siamna hmanruate an va hmu leh a ni. A kut aṭang hian pawisa fai cheng nuai 2.8 an man tel bawk.