Meghalaya-ah North East Food Show buatsaih
Meghalaya khawpui, Shillong-ah nimin aṭang khan ni thum awh tur North East Food Show buatsaih a ni, ramchhung leh rampawn aṭangin he show-ah hian mi 300 chuang zet an tel.
North East Food Show 2019 hi food company lian hnuaia investor lian leh business leader-te punkhawmna lian ber tur nia sawi a ni. He show hi India rama food business lam chawilarna hmanrua atana hman tum a ni bawk.
He show hi Meghalaya sorkar leh khawvela food innovation network lian ber, SIAL Group in a thleng a; Mexico, Costa Rica, Japan, Argentina, United Kingdom, Georgia, Chile leh Bangladesh aṭang pawhin he show-a tel tur hian an rawn kal a ni. Food & beverage industry lam aṭangin Purchasing Professionals Forum-India (PPFI), Forum of Indian Food Importers (FIFI) leh international trade aiawhte pawh an tel dawn bawk.
Meghalaya chief minister Conrad Sangma chuan show-a tel tura ramchhung leh rampawn lam aṭanga mi thahnem tham tak an kal chu lawmawm a tih thu sawiin, he show hian hmarchhak bialin food processing sector leh food industry lama an hmuh dan pawh a thlak danglam dawn hle tih a sawi.