Arunachal Pradesh : CM-in zirnaa kawnga hmalakna tur a puang

Arunachal Pradesh chief minister Pema Khandu chuan, Pathianni khan zirna kawnga hma lakna tur lian tham tak puangin, chung zingah chuan state-a tribal zirlaite IIT, global university leh pilot emaw merchant navy training programme-te a tel.

Dera Natung Government College (DNGC), Itanagar-a department pahnih dah belhna tur pawm niin, khawpui huam chhunga higher education-a zirlai tam lutuk tihziaawmna atan college pakhat siam belh a ni dawn bawk.

DNGC annual college week hawnnaa thu a sawiah, CM Khandu chuan sorkarin APST ṭhalai, IIT undergraduate course-a admission hmute tan scholarship 100% pek an ni dawn tih sawiin, khawvela university ṭha zinga chhiar 150-a seat chang theite pawh an rank a zirin pek an ni dawn tih a sawi. Sorkar chuan commercial pilot licence training mekte tan scholarship 75% pek an ni dawn a, merchant navy certification hmu phak ṭhalai mi 10 hnenah chhawmdawlna pek an ni dawn a sawi bawk.

DNGC-ah zirlai an tam avangin Khandu chuan state khawpui, Itanagar-ah college thar din a ṭul tih sawiin, bialtu MLA leh deputy commissioner chu college thar sakna tur hmun dap turin a hriattir. DNGC-ah hian Sociology leh Mass Communication department hawn belh a ni dawn tih a sawi bawk. Classroom pawh a rang thei ang bera sak a ni dawn a, academic session tharah chuan kalpui hman a ni dawn a ni.