Tripura : Unakoti district-ah dengue vei an pung

Tripura-a Unakoti district-ah dengue natna vei an pung nasa hle a, hri kai hmuhchhuah tawh chu mi 46 tling tawhin, tun dinhmunah mi 13 district hospital-ah enkawl mek an ni. Health official-te chuan dengue natna vei chu hei aia tam an awm an rin thu leh, mi tam tak chu enkawlna mumal dawng loin an awm mek tih an sawi.

Unakoti District Hospital medical superintendent, Dr. Rohan Pal chuan kar liam ta ni eng emaw zat chhungin dengue vei an pung nasa tih a sawi. Damlo te hi an dinhmunin ziaawm lam pan mah se, a hun taka enkawl an nih loh chuan harsatna nasa zawk a thleng thei tih a sawi bawk. Mipui chu anmahni duhthua in enkawl mai loin, khawsik an nei a nih chuan in test turin a chah a, district hospital-ah a thlawnin a test theih tih a sawi bawk.

District magistrate, Dr Tamal Majumdar chuan district hospital dinhmun hrechiang turin a tlawh a, medical staff-te chu a ṭul ang apianga hma la turin a hriattir. Health department thuchhuah chuan dengue chu tlang ram; Hira Chhara, Kalai Giri leh Deo Chhara bakah, khaw eng emaw zatah a pung zual tih an tarlang.

Muribari Primary Health Centre medical officer, Dr Hirak Deb chuan damlo tam tak chu enkawlna dawng loin an awm a, hei hian natna a ti darh nasa tih a sawi.