Manipur : Khuman Lampak-a nau pai awmna relief camp khar

Manipur tualchhung dinhmunin ziaawm lam a pan zel avangin, Khuman Lampak, Youth Hostel, Imphal-a hmeichhia nau paite tana relief camp an siam chu kum hnih hnu, Thawhṭanni khan khar a ni ta.

He relief camp hi May 21, 2023 khan siam ṭan niin, hmeichhia nau paiten damdawi lam enkawlna, chaw ṭha an dawn theihna atan din niin, rilru lama harsatna an neihte puih ṭhin an nih bakah, ṭha taka nau an neih theihna hmun a ni. Relief camp hi BJP OBC Morcha, Manipur Pradesh enkawl a ni. He hmunah hian nau piang 201 an awm hman a, hmeichhia 102 leh mipa 99 an ni.

Relief camp-a nau nei hmeichhia 196 zingah Bishnupur district aṭangin mi 66, Imphal East district aṭangin mi 45, Kakching district aṭangin mi 28, Churachandpur aṭangin mi 27, Imphal West aṭangin mi 13, Tengnoupal aṭangin mi 10, Kangpokpi aṭangin mi 5 leh Chandel leh Thoubal district aṭangin mi 1 ve ve an awm.

Thawhṭanni khan chief minister hlui, N Biren Singh chuan Swasti Puja, tualchhung mipuiten Epa Thaba tiha an hriat relief camp-a nau piang lawmna inkhawm buatsaihah a telpui. He hun hi nau pian hnu ni ruknaah malsawmna dilna atan hman ṭhin niin, nau piang hriselna leh damna atana inkhawm buatsaih ṭhin a ni. He inkhawm hmang hian hmeichhia naupai leh nau hnute pe lai chhawmdawlna atana hman ṭhin camp chu official-in khar a ni ta a ni.