Tripura : CM-in project 22 lungphum a phum

Tripura chief minister Manik Saha chuan Ningani khan Dhalai district-ah hmasawnna hna thawhna tur, Rs vbc 207 hu project 22 lungphum a phum. Chief Minister chuan a kaihhruai sorkar chuan an state-a infrastructure tihhmasawna turin theihtawp a chhuah zel tih a sawi. "Rs vbc 207 hu project 22 lungphum kan phum a, mahse, eptu lam chuan hmasawnna thlengte hi an hmu thei lo a ni. State hmasawnna tur hian kan theihtawpin kan thawk a ni," a ti.

Sorkar hnuaia department hrang hrangte pawhin hna ṭha taka thawkin, state mipui hmasawnna turin an bei a, hei vang hian hmarchhak state zingah Tripura chuan per capita income leh GSDP-ah pahnihna a ni thei a ni, tiin CM chuan a sawi.

"NITI Aayog pawhin Tripura chu state hmasawn zingah a puang a, hei hi sorkarin a tih tur dik tak a tih vang a ni. Nitina eizawnna, zirna leh healthcare lam thlengin state sorkar chuan mi zawng zawng hmasawnna thlen turin a tih theih tawkin a thawk a ni," tiin, hmeichhe enkawl Self Help Group thuam chakna hmanga self-employment lamah ṭhanna nasa tak a awm thu pawh Sahi chuan a tarlang bawk.

CM chuan, "Tripura chuan lakhpati didi 1,16,000 siam a tum aṭangin 1,08,000 a siam thei tawh a, a hlawhtlinna hi 90% vel a tling. Hmeichhia, mahnia eizawng tam tak pung chho hian state rural economy thlengin a thlak danglam a ni," a ti.