Delhi-a bomb puak kaihhnawihah Meghalaya-a hmun dap

National Investigation Agency (NIA) chuan tun hnaia Delhi-a Red Fort metro station bula car-a bomb puak kaihhnawihah South Garo Hills, Meghalaya-a Maheshkhola-Rongra area an dap.

Chief minister Conrad Sangma chuan NIA-in firfiak pawl nena inhnamhnawih, dan loa pem lutte chhuinaah an state-a hmun ṭhenkhat an dap thu hi a sawi. NIA chuan chanchin kimchang zawn chhuah tumin hma a la a, state sorkar pawhin a puih zel tur thu a sawi. Hemi rual hian hemi chungchang hi vantlang hriata kimchang puanzar chu an thil chhui hna thawhnaah nghawng a nei thei nia sawiin, an dap hmun takte a sawilang lo.

NIA-in an thil chhuina kal zelah an state-a hmun ṭhenkhat an dap avangin mipui tan chiaina tur a awm lo tih CM chuan a sawi a, an thil chhui mekna peng pakhat a ni, a ti. Shillong leh hmun dangah engmah buaina a awm loh thu a sawi bawk.

Red Fort bula pawikhawihna a thlen hnuah, NIA hian dan loa India ram lutte chhui hna a thawk bawk. Tripura-ah pawh state police-te nena thawk dunin, Bangladesh aṭanga dan loa India rama lut dap hna an thawk mek bawk. An dap chhan tak erawh an sawilang lo.