Tripura : CM-in tribal-te hmasawnna tur puang

Tripura chief minister Manik Saha chuan Inrinni khan state sorkarin janajati (tribal) mipui hmasawnna leh hamṭhatna a ngaih pawimawh thu sawiin, mitin huapzo hmasawnna chu an thil ngaih pawimawh ber zinga mi a nih thu a sawi.

Khumulwng-a Tripura Tribal Areas Autonomous District Council (TTAADC) headquarters, Khumpui Academy-a Janjatiya Gaurav Diwas puala programme buatsaiha thu a sawiah, Chief Minister chuan tribal mipui chawikan an nih loh chuan state-ah hmasawnna a awm thei lo, a ti. BJP sorkar chuan prime minister Narendra Modi ruahmanna siam zulzuiin hmasawnna a awm theihna turin hma an la tih a sawi bawk.

Prime Minister kaihhruaina hnuaiah tribal zalenna sualtu, Birsa Munda chanchin an hriat thu sawiin, Prime Minister chuan November 15 khan Janjatiya Gaurav Diwas chu janajati mipuiin India ram zalenna sual kawnga an tha a thawh avanga chawimawina hun a nih thu a tarlang. Birsa Munda chu tribal hruaitu ropui tak a nih thu sawiin, Prime Minister pawhin a huaisennate a hriatpui thu leh a chawimawi thu a tarlang.

State sorkar chuan janajati mipui hamṭhatna leh hmasawnna tur a ngai pawimawh tih tarlan a ni. Hemi kawnga a hmalakna hmang hian Tripura chuan national award pawh a dawng tawh tih CM Saha chuan a sawi bawk.

Chief Minister chuan sorkar thutlukna siam eng emaw zat puangin, state-a zirlai 34,000-ten hostel scholarship an dawn tur thu a sawi. Kumin chhungin zirlaite tan hostel seat 2,700 siam belh a ni dawn tih a sawi bawk. December 1 aṭangin hostel scholarship Rs 80 ni mek chu Rs 100-ah tihpun a ni dawn tih a tarlang.