Meghalaya : CM-in Japanese training programme hawng

Meghalaya chief minister Conrad K Sangma chuan ṭhalaite tan ram pawna hnathawh theihna hun ṭha siamna atan Japanese Training Programme buatsaih chu Thawhṭanni khan Meghalaya State Skill Development Society (MSSDS), Mount View Building, Shillong-ah a hawng.

He hmalakna hi Department of Labour, Employment & Skill Development buatsaih a ni a, state ṭhalaite Japan ṭawng zirtirna leh ram pawn industry-a hnathawh tur an hmuh theihna turin a pui dawn a ni. Hawnna inkhawmah hian labour minister Methodius Dkhar, ASEAN Group Co. Ltd chairman leh CEO Nishikwa Toshiaki, Japanese tutor-te leh MSSDS official-te an tel.

CM Sangma chuan sorkarin ram pawna hnathawk thei tura ṭhalaite chher hriam a ngaih pawimawh thu leh, field hrang hrangah Japan nen thawh hona ṭha tak an nei tih a sawi bawk. Chief Minister chuan Japan leh hmarchhak bial mipuite chu culture leh kawng hrang hrangah inanna tam tak an nei tih tarlangin, kum eng emaw chen Japan leh India chuan thawh hona an lo nei tawh tih a sawi bawk.

ASEAN Group nen an thawh hona hnuaiah Shillong-ah hian thla ruk chhung Japanese language training kalpui a ni ang. Programme-ah hian zirlai 86 an inziaklut tawh a ni. Japanese tutor pahnihte chu state-in a theih anga a thlawp zel tur thu CM chuan a sawi.

Sangma chuan kum hnih liam taah khan Japan-ah nurse pahnih, hna thawk turin an thawn a, tunah chuan nurse 37 thawk an awm tawh tih a sawi bawk. Heng nurse-te hian thla tin state-ah cheng nuai khat vel an chhunglut tih a sawi bawk.