Manipur : National Press Day hmang

Manipur sorkar chuan Pathianni khan National Press Day lawmna hun hmangin, thu dik lo thehdarh tur venna leh, journalist-te dikna chanvo vawnhim pawimawhnate sawi lan a ni. Kumin thupui atan 'Safeguarding Press Credibility Amidst Rising Misinformation' tih hman a ni.

Programme-ah hian Information and Public Relations (IPR) secretary, Hungyo Worshang chuan National Press Day chu India rama zalenna leh mawhphurhna nei sang tak press mite tan kumtin hman ṭhin a nih thu a sawi. Kumina an thupui hmangin thu dik lo darh ṭhin ven leh, media rintlak zawk humhalh a pawimawh thu a sawi.

Worshang chuan journalist-te harsatna tawh ṭhin tarlangin pressure group tam tak a awm avangin thudik thehdarh kawngah buaina an tawh phah fo tih a tarlang. Press chuan harsatna engpawh tawk se thudik a vawng nung reng tur a ni, a ti. Hei bakah AI (Artificial Intelligence) chuan mipui rilru sukthlek a kuai her nasa hle a, chanchinbu emaw lehkhabu emaw chhiar ai chuan mobile phone leh social media platform rinchhan an tam tawh tih a sawi bawk. Hemi chungchangah hian press mite chu nasa zawka hna thawk turin leh, thudik leh rintlak puan chhuah kawnga hma la turin a chah. Press mite dikna chanvo humhalh leh, media professional zingah thawhhona ṭha awm chu a pawimawh tih a sawilang.