Sikkim : CM leh Chief Justice-in District Court Complex lungphum phum

Sikkim chief minister Prem Singh Tamang leh High Court chief justice, Biswanath Somadder-te chuan Pathianni khan Soreng-a Civil Judge-cum-Judicial Magistrate Court huam chhungah District Court complex sakna tur lungphum an phum.

He hunah hian High Court judge Bhaskar Raj Pradhan, Sikkim Legislative Assembly speaker MN Sherpa leh, labour, building and housing minister Bhim Hang Limboo-te an tel. District leh session judge Dr Jwala D. Thapa chuan thu a sawi bawk.

Complex hi ram acre 2.6-a zauah sak a ni dawn a, square ft 1,13,952 a awh dawn a ni. District court building, annexe block, CJM court complex, District & Sessions Judge bungalow, leh Chief Judicial Magistrate leh Judicial Magistrate-te quarters tur a awm dawn a ni.

Chief minister Prem Singh Tamang chuan Soreng district tan hun pawimawh tak a nih thu sawiin, hmun hla leh tlawhpawh harsaa awmten hmun hla tak tak an pan a ngai tawh dawn lo tih a sawi.

Chief justice Biswanath Somadder chuan constitution-a lungphum pathum pawimawhna sawilangin, Tata Trusts-in India Justice report a tarlan angin, India rama state tenau zinga rorelna dik kalpui kawngah Sikkim chu hmahruaitu a nih thu a sawi. Khawtlanga mi hnuaihnung zawkte'n dikna chanvo inang tlang an neih theihna turin hmalak a ṭul tih a sawi bawk.