UNC hruaitute chungthu dan hmanga chinfel a ni ang: Manipur CM

Manipur Chief Minister Okram Ibobi Singh chuan United Naga Council President Gaidon Kamei leh Information Secretary S. Stephen-te chu dan hmanga an chungthu chinfel a nih tur thu a sawi.

UNC hruaitu pahnihte hi kar kalta Zirtawpni khan police-ten an man a, an chungchang ngaihtuah mek a ni. Manipur CM chuan Gaidon Kamei leh S. Stephen-te chungthu chu dan hmanga chinfel tur a nih thu sawiin, chhuah zalen tawp an nih loh tur thu a sawi. UNC leh Naga pawl hrang hrangte chuan Zirtawpni aṭang khan, UNC hruaitu pahnih police-te'n an man chhuah phutin darkar 24 awh nawrh an huaihawt a ni. Hetih lai hian Ibobi chuan nawrh huaihawtnaa inhnamhnawihte chu a ṭul dan anga man an nih zel tur thu a sawi.

UNC-te hian state sorkar-in district thar din tura a hmalakna chu nasa taka dodalin, November 1 aṭang khan Manipur mamawh lamkhawmna kawngpui pawimawh National Highway an dang chat a ni. State sorkar-in district-a hlankai a tum Sadar Hills chu politics vang chauha district pek tum a nih thu sawiin, hei hi an duh loh thu UNC-te chuan an sawi.

Manipur High Court chuan Zirtawpni khan UNC-te'n hun rei tak chhung NH an dan chungchang hi a ngaihtuah a, state sorkar chu heng NH pahnihah te hian lirthei tlan tir turin a hriattir. UNC-te'n hun rei tak chhung sorkar kar nana NH an dang leh hemi hnua an hruaitute man an nih chungchang hi Supreme Court-ah thlen a nih tur thu tarlan a ni bawk.

National Highway 2 leh 37 te hun rei tak chhung dan a nih avang hian mipui te chuan harsatna nasa tak an tawk a, thil man a sang chak hle. Ibobi chuan Zirtawpni khan truck 400 leh oil tanker eng emaw zatin Assam aṭanga Manipur an pan thu sawiin, harsatna thleng mek chu hun rei loteah chinfel beisei a nih thu a sawi. High court chuan Chief Secretary Oinam Nabakishore leh Director General of Police (DGP) L. M. Khoute-te chu lirthei tlan dan tur chungchanga ruahmanna siam turin a hriattir. Hetih lai hian UNC leh All Naga Students’ Association Manipur-te'n buaina nasa zawk an chawhchhuah venthawn thilah police-te chu venhimna khauh zawka kengkawh tura hriattir an ni bawk.

All Naga Students Union-te chuan tun hnai khan UNC president leh information secretary-te chu thu delhkilh awm loa chhuah turin an phut thu an au chhuahpui a, an duh anga hmalakna kalpui a nih loh chuan nawrh huaihawt an tum thu an sawi bawk. Hemi chungchangah hian Manipur High Court Chief Justice Rakesh Ranjan Prasad, Justices N. Koteshor leh K. Nobin-te chuan Zirtawpni khan thupek chhuahin, state sorkar chu truck leh oil phur te dan an nih tawh lohna turin police leh paramilitary forces tam zawk national highway-ah duty tir turin a hriattir a ni.

UNC president leh Information Secretary-te hi Senapati district-a UNC head office pana an kal laiin, police-te chuan Imphal-a Pheidinga-ah an lo man a, hren zui an ni. All Naga Students Union president S. Satang chuan he thil thleng hi an duh loh thu sawiin, UNC hruaitu hren mek te chu chhuah turin an phut tih sawiin, hei hi a hlawhtling lo a nih chuan na zawka hma an lak tur thu a sawi Satang chuan an thil phut nawr nan hian national highway bakah rel kawng thlenga dan an tum thu a sawi bawk.

United Naga Council-te hian state sorkarin district-a hlankai a tum, Sadar Hills chu hmasang aṭang tawha Naga-te chenna leh an ram a nih thu an sawi.