ULFA (I)-te'n `protest day’ an hmang

United Liberation Front of Assam (Independent)-te chuan Thawhṭanni khan `protest day’ an hmang a, sorkar laipuiin Citizenship Bill 2016 a duan chu an duh lo tih an tarlang.

`Protest day’ hi United National Liberation Front of WESEA (UNLFW)-te chuan an hmanpui a, sorkar laipuiin Bangladesh aṭanga pemlutte khua leh tui nihna pek an nih theih nana a hmalakna chu an duh lo tih an sawi. ULFA (I) chairman Abhijit Asom chuan, Prime Minister Narendra Modi chuan inthlan dawna a campaign khan
ṭhenawm ram Bangladesh aṭanga dan loa pemlutte chu an ramah thawn kir leh a tiam niin a sawi a, Modi chu a thusawi anga awm leh si loah a puh. BJP chuan Assam-a Bangladesh mi dan loa cheng leh khawsa te chu an rama thawn haw a tiam a, mahse tunah chuan heng mite India khua leh tui an nih theih na tur hian hma an la leh si a ni, Asom chuan a ti.

ULFA (I)-te chuan Assamese chu a tam thei ang ber hman an phut tih sawiin, school leh zirna in zawng zawngah hman an duh a ni. Bengali ṭawng chu hmang uar lo tur leh, Bangladesh mite pawh an rama thawn haw an nih theih nana hmalak an phut thu an tarlang bawk. ULFA (I)-te chuan Indian security forces-te'n state police-te nen aṭang kawpa hmarchhak hmun hrang hranga hel dap chhuah beihpui an thlak ṭhin chu an dem takzet tih an sawi. Kum 1990 khan Indian Army-te chuan hmarchhak helte lakah beihpui an thlak chiam a, hemi duh lohna lantir hian kum tin November 28 hi 'protest day' a tan helte chuan an hmang ṭhin a ni.