Assam Police-in APSC member dang man leh

Assam police-te chuan Thawhṭanni khan Assam Public Service commission (APSC) member dang Dr Basanta Kumar Doley chu thamna sum lak thubuaiah an man ve leh.

Police official chuan Doley chu hun rei tak an chhui tih sawiin, APSC hnuaia hnalaknaah thamna sum a la ngei nia hriat a nih avangin man a ni ta tih a sawi. Doley hi nimin khan court-ah a inlan nghal tura ngaih a ni a, police custody-ah ni 14 chhung dah a ni ang. Thamna sum lak thubuaiah hian APSC Chairman Rakesh Kumar Paul, member Samedur Rahman leh Assistant Controller of Examinations Pabitra Kaibarta-te chu man an lo ni tawh bawk. APSC Chairman Paul-a man a nih hnu hian Doley chu office lehkha pawimawhte halah puh a ni a, Doley chuan official paper a ni loh thu leh, thosi ur nan a office-ah a hal tir niin a sawi ve thung.

Assam sorkar chuan kar kalta Inrinni khan Assam Public Service Commission (APSC) chairman Rakesh Paul chu a lo suspend tawh a ni. Paul-a chungchangah hian President hnen aṭangin ban tura thupek chhuah a la nih loh avangin suspend rih a ni. APSC-a Deputy Controller of Examination Pabitra Kaibartya pawh kar kalta Zirtawpni khan Special Judge Court-ah a inlan a, a thil tih dik lohte a puang niin police-te chuan an sawi. APSC member dang Rahman pawh kar kalta Thawhlehni khan Court-ah a lo inlan a, December 6-ah inlan leh tura tih a ni.