Sikkim : COAS Upendra Dwivedi-a'n state tlawh

Chief of army staff (COAS) general Upendra Dwivedi chuan Sikkim tlawhin, state-a venhimna dinhmunte a thlir let bakah, chief minister Prem Singh Tamang nen a inkawm bawk.

Army Chief hi senior military commander zingah GOC-in C eastern Command, GOC Trishakti Corps leh GOC Black Cat Division-ten an ṭawiawm a ni. Inbiaknaah hian ram chhunga venhimna ngaih pawimawh a nih dan leh, sipai hmalakna hrang hrang an sawi ho.

Meeting hi Chief Minister chenna inah neih a ni a, sipai nena thawh hona, Sikkim veteran-te hamṭhatna leh Ranbhoomi Darshan programme hnuaia hmasawnna awmte sawi ho a ni bawk. CM Tamang chuan ramria venhimna kalpuina kawnga sipai leh state thuneitute inkara thawh hona ṭha a awm chu lawmawm a tih thu a sawi. Sorkar leh Sikkim mipuite chuan Indian Army chu an thlawp zel dawn tih a sawi.

Army Chief hian Black Cat Division hnuaia frontline post eng emaw zat a tlawh a, an hna thawh dante an lo hrilhfiah a ni. Tlangram hmun chhengchhe laia harsatna an tawh ṭhinte leh ruahmanna an neihte an hrilh hre bawk.

Sipaite chuan technology thar an hman thute lo hrilhin, ram chhunga siam drone an hman pawh General hian a endik bawk. COAS chuan tlang sang leh chhengchhe laia sipai awmte chu fakin; an thiamna, rintlakna leh inpekna chu ropui a tih thu a sawi.

Dwivedi-a awm chhung hian Veteran Achievers Award ceremony neih a ni bawk a, he hunah hian vantlang tana hnathawk ṭha leh military service zo tawh mi paruk hnenah chawimawina an hlan.