Fund tlem vangin Project thar kalpui theih a ni lo: NEC

North Eastern Council (NEC) chuan fund an hmuh tlem avangin, project kalpui kawngah harsatna an tawk mek tih a tarlang.

Fund a tlem vang hian project ṭhenkhat, educational institution dinna tur te, skill development centre leh sports academy kalpui kawngah te harsatna an tawk a ni. NEC Secretary Ram Muivah chuan project duan lawk eng emaw zat an neih thu sawiin, sum harsatna avangin kalpui theih a ni lo, a ti. Sum an dawn tawh aṭangin 99% an hmang chhuak tawh tih sawiin, hmasawnna hna thawk turin sum tam zawk mamawh a ni, a ti. Muivah chuan 9th Five Year Plan-ah an fund dawn 5.12%-ah a tlahniam tih sawiin, sorkar kum kal mekah sum indaih lohna a nasa hle tih a sawi.

NEC hian Border Roads Organisation tan cheng vaibel-chhe thum a dawng a, Alliance Air atan cheng vaibelchhe 47 leh sustainable livelihood programme hnuaiah North Eastern Region Community Resource Management Project atan cheng vaibelchhe 100 a dawng tawh bawk a ni. NEC chuan leiba cheng vaibelchhe 2,100 vel a neih thu sawiin, sum hmuh tawh aṭanga 70% zet chu project hrang hrang thawh meka leiba rulh nan hman a ni tawh tih Muivah chuan a sawi bawk.

Project kalpui nana fund a dawn cheng vaibelchhe 600 aṭanga 30% vel chauh chu project thar kalpuina turin a awm tawh tih sawiin, chu chu hmarchhak state pariat tan chuan a beitham hle a ni, NEC secretary chuan a ti. Muivah chuan, North East-specific organisation chuan educational centre eng emaw zat din turin ruahmanna a siam a, chung zingah chuan international institute of mass communication leh school of architecture, planning, music, art bakah theatre-te a tel a ni, a ti. Mizoram, Arunachal Pradesh leh Nagaland-te chuan medical college an la neih loh thu sawiin, heng state-ahte hian doctor 350 vel ṭheuh chauh an awm a ni, a ti.

NEC chuan Nagaland-ah football academy din turin sum a nei lo tih sawiin, sum harsatna avangin project thar kalpui theih a ni lo, a ti. Airport eng emaw zat din turin Airports Authority of India-ah rawtna thlen a nih thu leh, tourism project leh convention centre din turin hmalak a nih thu a sawi. Mahse heng zawng zawng hi fund indaih lohna avangin kalpui theih a ni lo tih NEC secretary Ram Muivah chuan a sawi.

NEC hian 12th Five Year Plan hnuaiah cheng vaibelchhe 3,622 a dawng a, chu chu NEC-in sum a mamawh zat nia tarlan cheng vaibelchhe 6,108 aṭanga 57% chauh a ni. NEC hian hmarchhak state-a hmasawnna hna thawk turin kum tin cheng 4,800 vel a mamawh nia tarlan a ni.