Assam dinhmun a la ṭha lo: Rijiju

Minister of State for Home Affairs, Kiren Ri-ji-ju chuan Assam-ah pawi-khawihna lian tham a la thlen fo thu leh, an din-hmun a ṭhat loh thu a sawi.

Kiren Rijiju chuan Lok Sabha inkhawm-ah zawhna chhangin,“Assam-ah thla ruk dang atan Armed Forces Special Powers Act (AFSPA) pawhsei leh a ni a, hei hian ṭhenawm state Meghalaya border km 20 a huam tel a ni" a ti. Assam dinhmuna ṭhat loh thu sawiin, kuminah pawh vawi eng emaw zat hel chetna a thleng tawh a, tun dinhmunah AFSPA hlih theih a la ni lo, a ti. Assam, Nagaland leh Manipur hmun ṭhenkhatah te AFSPA dodalna awm mah se hman chhunzawm zel chu sorkar laipuiin a tum a ni, Rijiju chuan a ti bawk.

Hetih lai hian United Liberation Front of Assam (ULFA)-te chuan tun hnai khan Bharatiya Janata Party (BJP) hruaitu
ṭhen-khat an fo avangin, venhimna khauh zawk pek an nih thu Assam police official-te chuan Thawhṭanni khan an tarlang. Intelligence chuan tun hnai khan BJP hruaitu
ṭhenkhat chu ULFA-te hian an bitum niin an sawi a, fimkhur turin a chah. Hetiang boruak vel avang hian BJP MLA Tapan Gogoi leh Bhaskar Sarma-te chu venhimna khauh zawk pek an lo ni tawh.

Pathianni zan khan BJP hruaitu Sibnath Brahma car chu mi tu tih hriat lohten Kokrajhar-ah an hal sak a, mi pakhatin hliam a tuar. Hel nia hriat mi pahnih te chuan Brahma car chu panin an bei zui chiam nia sawi a ni. Police-te chuan pawikhawihtute hian BJP hruaitu hi an bitum niin an sawi a, tute nge hriat an la ni lo tih an sawi. State pumah venhimna khauh zawk kenkawh a nih tur thu sawiin, helte pawikhawihna thleng thei lakah inven a ngaih thu an sawi. Naga hel National Socialist Council of Nagaland (Khaplang) (NSCN-K)-te chuan Assam an lut niin Police official chuan a tarlang bawk.