Tripura-ah pawisa thi duh lohna lantirin nawrh huaihawt

Communist Party of India-Marxist kaihhruai Left Front sorkar chuan Thawhṭanni khan Tripura hmun hrang hrangah pawisa tih thih duh lohna lantirin darkar 12 awh nawrh an huaihawt.

Police-te chuan sorkar office kawt leh railway station-a nawrh huaihawt mi 1,500 vel zet an man. Nawrh huaihawt a nih vang hian private office, bank, zirna in, dawr leh sumdawnna hmunte khar a ni. Security force motor tih loh lirthei dang che vel hmuh tur a awm meuh lo a, hmun eng emaw zatah motor kawngpui leh rel kawngte dan a ni. Police thupuangtu Uttam Kumar Bhowmik chuan buaina chhuak lian tham a awm loh thu sawiin, opposition party - Trinamool Congress leh Congress party te chuan nawrh huaihawt hi an thlawp lo tih a sawi. BJP party pawhin nawrh huaihawt duhlohna lantir hian kawng an zawh ve bawk.

Left Front hruaitu leh Lok Sabha member hlui ni bawk Khagen Das chuan, sorkar laipuiin Rs 500 leh Rs 1,000 note a tih thih hian mi rethei zawk leh sumdawngte tan harsatna a thlen nasa em em a, state mipui leh sorkar chuan an tuar nasa hle tih a sawi.

Hetih lai hian Tripura Chief Minister Manik Sarkar chuan Prime Minister Narendra Modi-a'n pawisa thiin nghawng a neih te enfiah tura panel a dinah member ni tura sawmna chu a hnawl tih Thawhlehni khan a sawi. Sarkar chuan Prime Minister thurawn angin, Finance Minister Arun Jaitley chuan Thawhṭanni khan phone hmanga a biak thu sawiin, Chief Ministerial Committee-ah tel tura a sawm thu a sawi. Mahse committee-a tel chu a tum lo tih Jaitley a hrilh niin a sawi.

Chief Ministerial Committee-ah hian political party hrang hranga Chief Minister-te chu tel tura sawm an ni a, anni hian sorkar laipuiah pawisa thi chungchangah rawtna an thlen thei dawn nia tarlan a ni.