Manipur-ah customer-te'n bank bei

Manipur-a State Bank of India (SBI) branch pahnih chu Thawhṭanni khan an customer thinrim ten an bei.

SBI branch pahnihte chuan sum indaih lohna avangin account pakhat aṭangin lakchhuah theih chin, Rs 24,000 chu an pe thei lo tih an sawi a, customer thinrimte chuan bank hi an beizui ta mai nia tarlan a ni. He thil thlengah hian police pakhatin hliam a tuar a, darthlang leh bungrua eng emaw zat tihchhiat a ni. Pawikhawitute zingah hian man an la awm lo a, thil thleng hi chhui chian mek a ni.

Buaina hi Manipur University chhunga SBI branch aṭanga inṭan nia sawi a ni. Branch manager Prasad Jain chuan, senior official-te'n pawisa indaihlohna avangin sum duh duh zat a lakchhuah theih loh thu an sawi a, an mahni dawrtute chuan hei hi hrethiam loin an thinrim zui ta mai a ni, a ti. Anmahni dawrtu pakhat N. Birean chuan pawisa la chhuak turin zing hma takah bank an pan tih sawiin, bank thuneitute lamin account pakhat aṭangin Rs 2,000 bak lakchhuah an phal lo a, mipui thinrim chuan buaina an siam ta mai niin a sawi. Hetih lai hian SBI lam chuan account pakatah Rs 4,000 zel an pe chhuak niin an sawi thung.

Riot police-te chuan buaina chhuahna hmun hi an pan nghal a, buaina lian zawk a chhuah hmain an thunun a ni. Imphal West district, Leimakhong-a SBI branch-ah pawh buaina chhuakin office bungrua eng emaw zat chu tihchhiat a ni. Heng thil thleng avang hian state chunga SBI branch zawng zawngah duty dah belh an ni a, thawktute chu venhimna khauh zawk pek an ni. Tun hma pawhin bank staff leh customer-te inkarah inhriatthiam lohna a thleng fo tawh a, mahse thawktute leh office beih a thlen vawi khatna nia tarlan a ni.