NESO-in CAB chungchanga Cabinet thutlukna sawisel

North East Student's Organisation (NESO) chuan Nilainia union cabinet-in Citizenship (Amendment) Bill, 2019 a pawm leh, karleha Parliament-a pharh tura ruahman a nih chungchangah BJP kaihruai National Democratic Alliance (NDA) sorkar chu na takin a sawisel. 

NESO hotu Samuel Jyrwa chuan, "Cabinet thutlukna hi kan dem hle a ni. Tihluihna hmangin hmarchhak state-ah CAB hi hman ngei an tum a ni," a ti. Sorkar laipui chuan hmarchhak bial mipuite CAB an duh loh leh an dodal dante  hre vek chungin, an kaltlang pui lui a, mipuite  rilru a ti na hle a ni, a ti. 

Jyrwa chuan NESO chuan cabinet thutlukna siam chungchang sawihoin meeting an neih leh vat tur thu a sawi a, Parliament-a CAB pass tur dan ngei a nih theihna atana hma lak dan turte pawh an rel dawn tih a sawi. 

NEO chuan Parliament-a CAB pass a nih chuan hmarchhak state hrang hrangah buaina a chawk chhuak ngei dawn tih a sawi bawk. 

Hmarchhak state hrang hrangah CAB duh lohna hi lantir chhun­zawm reng a ni a, nimin pawh khan Guwahati, Assam-ah Krishak Mukti Sangram Samiti (KMSS) kaihhruaiin union cabinet-in CAB a pawm avanga lungawi lohna leh, he bill dodalna hi lantir chhunzawm a ni. 

Nimina nawrh huaihawtte chuan sawisel hlawh tak, CAB hi hnukkir turin sorkar laipui an phut thu an sawi. "CAB hi hnuhkir a nih loh chuan, state mipuite chuan kum 2021-ah Sarbananda Sonowal kaihhruai BJP sorkar chu an paihthla ngei dawn a ni," tiin KMSS hruaitu Akhil Gogoi chuan a sawi. 

Goigoi chuan CAB hi Parlia­ment-ah pass a nih chuan, Assam mipuite chu Assam aṭanga BJP leh RSS paihthla turin an inpeih reng a ni, tiin a sawi. BJP chuan politics-a hlawkna a duh avangin state mipuite duhdan te a palzut sak a ni, a ti. 

Tripura-ah pawh Indigenous Nationalist Party of Tripura (INPT) activist-te chuan CAB duh lohna lantirin nimin zing khan national highway leh rel kawngte an dang.  Union cabinet-in CAB a pawm avanga lungawi loin, Nilaini zan aṭang khan Baromura hill range-a Khamting Bari area-ah INPT mi leh sate an lo pungkhawm tawh a ni. 

Nimin zing dar 6 aṭang khan darkar 13 awh tur nawrh huai­hawtin, national highway leh rel kawngte hi an dang a, hei vang hian nimin zinga an state-a rel tlan turte cancel vek an ni. 

INPT general secretary Jagadish Debbarma chuan hmarchhak state-a political party hrang hrangten CAB an duh loh leh an dodal thu an sawi reng chungin union cabinet chuan a pawm lui tho a ni, tiin sorkar laipui hnenah he bill hi Parlia­ment-a pass lo tura an ngen nawn leh thu a sawi.