Nagaland : Naga Students' Federation-in ILP checkpoint siam phut

Nagaland-a Naga Students' Federation (NSF) chuan Dimapur airport leh rel station-ah Inner Line Permit checkpoint a rang lama siam an phut a, an state chu immigration monitoring system-ah an hnufual tih an tarlang bawk.

November 19-a Kohima-a APO Oking-a Angami Public Organization leh a kaihhnawih pawlte nena coordination meeting an neihah, NSF president Mteisuding chuan Inner Line Regulation tihchak chu state inrelbawlna mai bakah, Naga mipui dikna chanvo humhalh leh ram leh hnam hmalam hun atana thil pawimawh tak a nih thu a sawi.

Inner Line Regulation Committee member, NSN Lotha chuan sorkar hnenah rawtna an siamte kimchang zawkin a tarlang. Dimapur airport leh rel station chu ram pawn lam mi an state-a an luh tamna a ni tih sawiin, endikna mumal erawh a awm lo a ni, a ti. Meeting-a tel Angami Women Organization leh Angami Students' Union chuan helai hmuna Inner Line Permit system dah an thlawp tih an sawi bawk.

APO president Theja-o Vihienuo chuan ILP chungchangah Core Committee din a nih thu a sawi. Hmalakna zau zawka neih a ṭul thu tarlangin, ram pawn aṭanga hnathawk tur lak luh tihtlem a nih theihna atan ṭhalaite thuam chak leh eizawnna ngelnghet siamsak a pawimawh thu a sawi bawk.