Arunachal Pradesh : NCPCR-in thubuai 26,000 chingfel tawh

Arunachal Pradesh-a state-level conference neihah National Commission of Child Rights (NCPCR) chuan thubuai 26,000 dawn chinfel a ni tawh tih tarlangin, naupang venhimna beihpui thlak mekah, India ram hmun hrang hrangah naupang 2,300 chhan chhuah an ni tawh bawk.

POCSO juvenile justice leh special cells division hotu, Paresh Shah chuan naupang dikna chanvo bawhchhiatna a thlen nasat thu sawiin, sorkarin a hun takah an hmalam hun zel atan hma a lak a ṭul tih a tarlang.

Shah chuan naupang dikna chanvo humhalhna kalpui dana inthlauhna leh harsatna awmte sawilangin, sorkar laipui leh state sorkarin naupang dikna chanvo humhalh turin theihtawp chhuah mah se, dan khauh tak siam ringawt chuan awmzia a nei lo tih a sawi. Naupang dikna chanvo humhalh tur chuan uluk taka endikna kalpui, mipui zirtirna pek, leh thawhhona ṭha neih a pawimawh thu a sawi nawk.

Commission chuan beihpui thlak mekah hian naupang 1,000 chuang chu an chenna district-ah a hruai kir bawk a, NCPCR-in technology system thar a kalpui hmangin a pui bawk a ni.

Shah chuan commission-in naupang rilru hriselna a ngai pawimawh tih sawiin, naupang laka mipat hmeichhiatna lamhawia pawikhawihna thleng ṭhin hmachhawn turin AI hmanrua hman a tum a ni, a ti. Naupang dikna chanvo humhalh kawnga harsatna thleng ṭhin sutkianna atan ruahmanna thar siam a tum bawk. Naupangte dikna chanvo humhalh turin sorkar official, sikul, dan kengkawhtute leh civil society pawlin thawh hona ṭha neih a pawimawh tih a sawi.