Assam : Guwahati-ah International Visa Centre siam dawn

Assam chief minister Himanta Biswa Sarma chuan Assam leh hmarchhak bial mipui tan Guwahati-ah International Visa Centre siam a ni thuai dawn tih a puang. Centre siam hunah chuan hmarchhak bial mipui, rampawn lama zin ṭhinte tan visa buaipui turin Delhi emaw Mumbai emaw pan a ngai tawh dawn lo tih a sawi.

Chief Minister hian visa outsourcing leh technology service provider hlun, VFS Global nen Guwahati-a visa centre din a nih theihna tura inremna an siam hnuah he thu hi a social media-ah a puang a ni. Assam leh hmarchhak bial mipuiin hun rei tak harsatna an lo tawh ṭhin a sukiang dawn tih a sawi bawk. Tun thlengin visa buaipui turin zirlai, professional leh tourist-te chuan hmun hla zawk an pan a ngai a, phurrit a siam nasa hle a ni, a ti.

CM chuan VFS Global nen visa centre din tura inremna an siam chu lawmawm a tih thu a sawi a, visa buaipui tura Delhi leh Mumbai panna lama sum tam tak sen ṭhin pawh a titawp dawn tih a sawi. Thu chiang leh kimchang zawk hun rei loteah puan a ni dawn tih tarlangin, Guwahati-a visa dil theihna hman ṭan a nih hun tur pawh puan a ni thuai dawn tih a sawi bawk.