Manipur : Police officer beih vangin thubuai theh lut

Manipur Police-te chuan Ningania Palace Compound-a nawrh huaihawtnaah police officer pakhat beih a nih avangin Porompat Police Station-ah thubuai an theh lut.

Ningani chawhnu dar 1:15 vel bawrah mi 50-60, COCOMI volunteer nia hriatte chuan Govindajee Crossing aṭangin Sangai Festival 2025 neih duh lohna an lantir a, thuziakte kengin an duh lohna thute an aupui bawk. Pungkhawmte hian Imphal East District Magistrate-in khapna thupek a tihchhuah bawhchhiain, Hapta Kangjeibung lam panin lungawi lohna an lantir tih official-te chuan an sawi.

Police official-te chuan security-ten nawrh huaihawt tihtawp an tum thu leh, buaina leh tharum thawhna tel loin mipui pungkhawm hnawtdarh turin vawi tam tak an bei niin an sawi. Inspector general of police (Zone-I), Themthing Ngashangva chu nawrh huaihawtnaah hian an dinhmun thlithlai turin a tel ve bawk. Police team-te chuan mipui pungkhawm chu hnawhdarh an tum a, mahse mipui lam hian police-te chu tui bottle leh placard hmangtein an bei zui a ni. IGP hi nawrh huaihawt zinga hmeichhe pakhatin a bei a, chi inthliarna ṭawngkam a hmang bawk niin an tarlang.

Mipui pungkhawm chuan Palace an pan a, MP house guard-te chuan luh a lo phalsak a ni. Hemi chungchangah hian IGP chuan,house guard-te chetdan pawh a zawt fiah a, Palace chhungah erawh a lut lo tih police-te chuan an sawi. Police-te chuan Porompat Police Station-ah hian Bharatiya Nyaya Sanhita (BNS), 2023 hnuaiah vantlang tana hnathawk beih, duty tibuai, security barricade tichhia, chi inthliarna lam hawi hmang, leh phalna nei loa Palace Compound chhunga luh thubuai an theh lut a ni.