Tripura : Cabinet-in state university thar pahnih pawm

Tripura State Council of Ministers chuan chief minister Manik Saha kaihhruaia cabinet meeting neihah state university thar pahnih siam a pawm.Meeting thutlukna hi cabinet thupuangtu leh tourism minister Sushanta Chowdhury chuan a puang a ni.

Tripura-ah hian state sorkar enkawl university pakhat, Maharaja Bir Bikram University a awm mek a ni.

Civil Secretariat-a thuthar lakhawmtute a kawmnaah, Chowdhury chuan State Council of Ministers-in Tripura-ah Technical University hmasa ber din tura rawtna a pawm thu sawiin, Tripura Institute of Technology (TIT) chu state-a technical university hmasa ber ni turin tihchangtlun a ni dawn a ni, a ti. State-a polytechnic college-te pawh a enkawl vek dawn tih a sawi bawk. Hei bakah Agartala-a Women's College chu, Women's University-ah hlankai a ni dawn tiin a tarlang.

Cabinet chuan sorkar department hrang hranga post 385 hnawhkhahna tur a pawm bawk a ni. Co-operative department hnuaiah Auditor post ruak 97 a awm a, Investigator leh Statistical Investigator chu JRBT kaltlanga hnawhkhah a ni ang. Council of Ministers-in a rel angin, ICDS project hnuaia Supervisor hnaruak 28 awm chu Tripura Public Service Commission (TPSC) hmanga lak a ni ang.

Urban Development department hnuaia Civil, Engineering, Mechanical leh Public Health Engineer-ah post 14 siam cabinet chuan a remti bawk. Council of Ministers chuan Tripura Film & Television Institute hnuaiah faculty member pariat dah turin thutlukna a siam bawk a ni.