Meghalaya : CM-in Christian charitable trust centre hawng

Meghalaya chief minister Conrad K Sangma chuan Inrinni khan Nonglum, Umroi, Ri Bhoi district-ah Caring for India (CFI) centre thar a hawng. Hawnna inkhawmah organisation nursing college-ah ram pawn lam ṭawng zirna dah tel a ni dawn tih CM chuan a puang bawk.

Retreat center thar hi tlawhtute tan chawlh hahdamna hmun atana siam niin, nursing college-ah hian Meghalaya leh hmarchhak biala zirlaite tan zirna ṭha zawk a pe chhunzawm zel bawk dawn a ni.

Hawnna inkhawma thu a sawiah, Sangma chuan state sorkarin CFI thawhpui turin ruahmanna a siam thu sawiin, he hmalakna hian ṭhalaite chuan chhungkaw chawmna atan healthcare sector-ah ram pawna hnathawh theihna hun remchang a siamsak dawn a ni, a ti.

Nursing leh healthcare service chuan helai biala ṭhalaite tan hnathawh tur tam tak a siam tih sawiin, hun remchang siamsaktu CFI hnenah Sangma chuan lawmthu a sawi bawk. Thawh hona ṭha an neih chuan ṭhalaite a thuam chak dawn a, khawtlang rawngbawlnaa tum thuhmun an neih pawh a tichak dawn a ni tiin a sawi.

Umroi nursing college-ah hian zirlaite chu healthcare lama thiamna an neih theihna tur leh, hna ṭha an hmuh theihna turin training an pe ṭhin a, Meghalaya leh hmarchhak bial state dangah hnathawk eng emaw zat an awm tawh bawk a ni.