Tripura : CM-in thingtlang hmasawnna ngai pawimawh

Tripura chief minister Manik Saha chuan, nimin Thawhṭanni khan hmasawnna project hrang hrang chu state khua leh tui zawng zawng tan a nih thu leh, thingtlanga chengte ngaih pawimawh an ni dawn tih a sawi.

Agartala-a Pragya Bhavan-a hun a hmanah Rural Development Department, Chief Minister Gram Sampak Yojana, Chief Minister Gram Samriddhi Yojana 2.0 leh, Mega Griha Pravesh hnuaia hmasawnna hna thawh eng emaw zat a hawng. District leh block-a hnathawk ṭhate hnenah chawimawina a hlan bawk a, sorkar hmalaknaa hlawhtlinna awm tawh tarlanna booklet a tlangzarh bawk.

CM Saha chuan sorkar scheme-in hmaih bik nei loa mitin hnen a thlen chu a ngaih pawimawh ber a nih thu a sawi. Rural Development Department chu sorkar laipui leh state sorkar scheme thawh kawnga pawimawh ber an ni tih sawiin, project hrang hrang chu ṭhalaiten hnathawh tur an neih theihna atan te, sanitation, infrastructure, women socio- economy hmasawnna atan a pawimawh tih a tarlang.

Chief Minister chuan state-in national level Pachayat Awards pasarih a dawng tawh tih sawiin, sum an dawn tawh zat belhkhawm chu Rs vbc 10 a tling tawh tih a sawi. Prime minister Narendra Modi-a'n mipui chenna tur in sak kawngah hma nasa taka a lak thu sawiin, chenna in mai bakah thingtlanga chengte hma hun zel tur sorkarin a ngai pawimawh hle a ni, a ti. Tripura mipui 75% chu thingtlangah an cheng a, hmasawnna pawh nasa zawka kalpui a ni tih a tarlang bawk.