Mumbai Police-te'n Assam hmei-chhe pakhat chhanchhuak

Assam-a hmeichhe pakhat kum 15 mi chu hna pek tiamin mi ṭhenkhatin Mumbai-ah an hruai a, hralh an tum laiin Mumbai police-te'n an chhanchhuak

Juvenile Aid Police Unit (JAPU) official-te chuan he hmei-chhia hi November 21 khan Mumbai thlenpui a nih thu sawiin, report an dawn bawh-zuiin kar kalta Inrinni leh Pathianni khan chhanchhuah tumin an bei tih an sawi. He hmeichhia hi Dahisar-a slum area-a room pakhatah khung a nih thu sawiin, anmahni dawr tur anga insawiin an zinga pakhat chu an tir a, an man chhuak ta tih an sawi. Chhanchhuah hna hi police officer paruk leh woman constable-te'n an thawk a ni.

Police-te chuan he thila bultumtu bera puh Majnu Ali Sardar (28) chu an man tawh a, Sardar chuan he hmeichhia hi cheng nuai khata hralh an tum thu a sawi. Hmeichhia hian Mumbai-a hnathawk tura an thlem ngei thu leh, a chhungten an remtih avanga kal a ni thu a sawiin, hna pek tiamtute chu a hriat ngai mi an nih loh thu a sawi.

JAPU police inspector Pravin Kadam chuan hmeichhia hi children home-ah dah a nih thu sawin, pawikhawihtu an man Sardar chu Dahisar police-ah hlan a ni, a ti. Sadar hi thu zawhfiah a ni a, a thurualpuite zawn mek an ni. He thil thleng chungchangah hian Indian Penal Code, Protection of Children from Sexual Offences (POCSO) Act leh The Immoral Traffic (Prevention) Act hnuaiah thubuai ziahluh a ni.