Thailand leh Arunachal-te'n inremna ziak

Thailand-a Surindra Rajabhat University Regional Development Strategies Foundation (SRRURDS) leh Aruanchal Pradesh-a Mahabodhi Lord Buddha College (MLBC)-te chuan education leh culture lama thawk dun turin inremna an ziak.

SRRURDS leh MLBC-te chuan thuchhuah siamin, inremna chu Arunachal leh Thailand-te'n inzawmna ṭha zawk an neih theih nana hmalakna a nih thu an tarlang. MoU hi SRRURDS-a Associate professor Dr Achara Phanurat leh MLBC director Ven. Bhikkhu Panyaloka-te chuan New Delhi-ah an ziak a, AP deputy chief minister Chowna Mein leh Royal Thai Embassy-a minister councillor Tharadol Thongruang-te'n an telpui a ni.

AP deputy chief minister Mein chuan, MoU chu Act East Policy hlawhtlinna kawng khat a nih thu sawiin, thawhhona ṭha tak a awm theih a beisei thu a sawi. Arunachal sorkar chuan Act East Policy chu a takin a kalpui tih sawiin, a hlawhtlinna a lang chho mek zel a ni, a ti. Inremna ang chuan cultural exchange, linguistic leh research activity hrang hrang buatsaih ṭhin a ni ang.

German research scholar lar tak Dr Gerhard Heller chuan he hun hi a hmanpui bawk a, Arunachal chu bio-diversity leh culture-ah te a hausa hle niin a sawi. Kawng hrang hrangah research tih nana remchang tak a nih thu sawiin, tourism, cultural leh thil dangah te hmasawn zel turin duhsakna a hlan tih a sawi.