Venhimna hnuaiah truck 500 chuang Imphal thlenpui

Bungraw phur truck 500 chuang zet chu venhimna hnuaiah Manipur khawpui Imphal thlenpui an ni.

November 1 aṭanga United Naga Council (UNC)-te'n Manipur chak­khai lamna kawngpui pawimawh, National Highway 37 leh 2 an dan chu an la kalpui zel a ni. UNC-te hian hmun ṭhenkhatah kawngpui an laikhuar nia tarlan a ni a, lirthei chevel dan nan hian lung leh thil dang an hmang bawk. UNC president Gaidon Kamei leh publicity secretary Stephen Lamkang-te chu man an lo ni tawh a, an hruaitu pahnihte chhuah phut hian Thawhlehni khan nasa zawka nawrh huaihawt leh a ni. UNC-te chuan an hruaitute chu thu delhkilh awm loa chhuah turin sorkar an phut a, an thil phut a hlawhtling lo a nih chuan sorkar nawr chhunzawm zel an tum thu an sawi.

Manipur Chief Minister Okram Ibobi Singh chuan, UNC hruaitu te chungthu hi dan hmanga chinfel a nih tur thu a lo sawi tawh a, chhuah mawl tawp theih an ni lo, a ti. Hei hi UNC-te chuan duh loin, an hruaitute chu a rang thei ang bera chhuah an phut tih an sawi. Manipur High Court chuan satte sorkar chu NH-a lirthei tlan dan tur mumal taka ruahman turin a lo hriattir tawh a, harsatna lian zawk a chhuah lohna turin venhimna khauh zawka lekkawh turin a hriattir bawk. Hetih lai hian state sorkar chuan Naga-te chenna area huamchhungah lirthei tlan dan turah ruahmanna a la siam thei lo nia tarlan a ni.

Naga-te leh Manipur sorkar inkara buaina hian hun a awm rei tawh hle a, November thla tir aṭang khan a inṭan tawh a ni. UNC-te chuan Manipur sorkar hnenah Sadar Hill chu district-ah hlangkai lo turin an ngen a, Sadar Hills chu hmasang ata tawh Naga-te chenna a ni tiin "Naga Territory' chu district-a hlankai an remti lo. Hetih lai hian state sorkar chuan district pek chungchangah sorkar laipui leh Naga-te rawn an tum loh thu sawiin, an thuneihna a nih thu an sawi. Mahse Sadar Hills leh Jiribam-te chu tun thlengin district-ah puan an la ni lo thung.

National Hiaghway pahnih dan a nih avang hian nunphung a khaihlak nasa a, thil man a sang chak hle bawk. Nitin mamawh sang chho zel khuahkhirh turin sorkar chuan hma a la mek a, venhimna hnuaiah Assam leh hmun danga truck tangkhangte chu Imphal hruai thlen an ni. Truck tam zawk chu an la tangkhang mek a, hengte hruai chhuak tur hian hma lak mek reng a ni. Nitin mamawh duh ang hmuh tur a awm loh avang hian thil man a sang hle a, gas bur khat Rs 1,500 tein lei a ngai a, petrol man pawh Rs 300 te a ni nawk. UNC-te hian Senapati district-ah truck an lo hal tawh bawk a ni.