Tripura : CM-in zirtirtu 1,733 lakna tur ruahmanna puang

Tripura chief minister Manik Saha chuan Thawhṭanni khan zirna ecosystem tihchakna atan category hrang hrangah state sorkarin zirtirtu 1,733 lakna tur ruahmanna a siam tih a puang. Sorkar programme buatsaiha thu a sawiah, Saha chuan education department-in kum 2018 aṭang khan zirtirtu leh staff 6,998 a la tawh tih a sawi.

Sorkarin hna thawh tur a siam tam tawk lo nia sawi chungchangah, Saha chuan kum 2018 aṭang khan sorkar department hrang hrangah ṭhalai hna nei lo 20,181 vel dah an nih tawh thu a sawi. Hei bakah mi 5,000 vel chu contract basis-a thawk tura lak an ni tawh a, zirtirtu hna 1,733 hnawhkhahna tur kalpui ṭan a ni tih a sawi bawk.

CM Saha chuan sorkarin hna neih loh avanga harsatna awm thei sutkian tumin nasa takin hma a la tawh a, health and family welfare leh education department-a hnathawk tur lak kawngah harsatna a awm dawn lo, tiin a sawi.

BJP kaihhruai sorkar chuan langtlang takin hna lak policy a kalpui a, induhsakna hmanga sorkar hna hmu an awm lo, tiin CM chuan a sawi. Transfer policy pawh langtlang takin a kalpui bawk a ni, a ti. Sorkar doctor (MBBS) chu MD emaw MS emaw zir theihna hun remchang a neih theihna atan thingtlang damdawi-inah kum thum chhung an awm a ngai ṭhin a, tunah chuan thingtlang damdawi-ina thawk turin marking system hman an tum tih a sawi bawk a ni.