Assam-in vaihlo khapna kum khat dang pawhsei leh
Assam health and family welfare department chuan state chhunga Gutka, Pan Masala leh vaihlo leh nicotine telna dangte siam, zawrh leh lei khapna a siam chu kum khat atan a pawtsei leh.
Vaihlo leh a kaihhnawih hi Food Safety and Standards (Prohibition and Restrictions on Sales) Regulations, 2011 Regulation 2.34 hnuaia Food Safety and Standards Acts, 2006, Section 26 hnuaiah khap a ni.
Sorkar thuchhuah chuan Consumers' Legal Protection Forum, Assam ngenna angin kum 2019, November 22 khan a vawi khatna tan state chhunga vaihlo leh nicotine telna chi siam, zawrh leh lei khapna thupek chu tihchhuah a ni tih a sawi. Nikum November thla khan he khapna hi pawhsei turin ngenna an siam leh a ni.
Consumers' Legal Protection Forum, Assam secretary advocate Ajoy Hazarika chuan Assam sorkarin vaihlo khapna a pawtsei leh ta chu lawmawm a tih thu sawiin, "Covid-19 hripui leng mek karah, vaihlo leh a kaihhnawih lo hmante hi hri kai tan a hlauhawm zual bik a ni. He khapna pawhsei hian Assam mipuite hriselna dinhmunah nghawng ṭha tak a neih ngei kan ring a ni," a ti.