Assam : Hmun pangaah bomb a puak

Nimina rampuma Republic Day lawmna neih a nih laiin Assam state-ah chuan hmun pangaah bomb  a puak a, mahse thil tih chhiat liantham a nei lo a, thi leh hliam pawh an awm lo.

Nimina bomb puak zinga pathum hi Dibru­garh district-a puak a ni. Chief minister Sarbananda Sonowal chuan he thil thleng hi a dem thu sawiin, mi dawihzepten ni pawimawh tak tihchhiat an tumna a ni, a ti. Mi­puite chuan heng mite hi an thlawp duh lo a, hei vang an beidawng chu hetiang zawng hian an che ta niin a sawi. Sorkar chuan pawikhawihtute chu zawng chhuakin, an phu ang hremna a pek ngei tur thu a sawi. 

Helpawl United Libe­ration Front of Assam (Independent) (ULFA-I) chuan Assam-a Republic Day lawmna hi an boy­cott dawn tih an lo puang tawh a, mipuite pawh he ni lawmnaa tel lo turin an chah a ni.