Manipur-ah acre 1,420-a zaua poppy chin tichhe tawh

Manipur chief minister N Biren Singh chuan state sorkarin ruihhlo do beihpui a thlakna peng pakhatah kum 2020-2021 chhungin ram acre 1,420-a zaua poppy chinte chu tihchhiat a ni tawh tih a sawi. 

Churachandpur police-te chuan January 8 khan Sangaikot subdivision hnuaia Songpeh leh Molneiphai hmuna dan loa poppy chinna zawngin beihpui an thlak. Anni bakah Narcotics and Affairs of Border (NAB), Imphal East leh Saikul police-te thawkdun chuan Maharni hill range-a ram acre 70-a zaua poppy chin chu an tichhe bawk. 

State sorkar  hian drug-free Manipur siam tumin 'War on Drugs' mission a kalpui mek a ni. He mission hnuaiah state chhunga ruihhlo siamna atana hman, poppy chinna hmun dapchhuah hna chu district hrang hrang police-te chuan tualchhung mite puihnain an thawk mek a ni. 

Kum 2020 chhung khan poppy chinna, Ukhrul district-a ram acre 910, Senapatir district-a acre 190, Kangpokpi district-a acre 120, Churachandpur district-a acre 50, Tengnoupal district-a acre 30 leh Imphal East district-a acre 15-a zau te chu tihchhiat an ni tawh a ni.