Tripura : Loneituten PM-Kisan scheme hnuaiah Rs vbc 900 dawng tawh

Tripura-a loneitu nuai 2.5 dawn chuan Pradhan Mantri Kisan Samman Nidhi (PM-Kisan) hnuaiah Rs vbc 900 an dawng tawh tih agriculture and farmers welfare minister, Ratan Lal Nath chuan Ningani khan a sawi.

State-level orange festival-a thu a sawiah, Nath chuan scheme instalment vawi 21-na chu state hmun hrang hranga loneitute hnenah pek chhuah a ni tawh tih a sawi. Scheme kalpui a nih aṭangin Rs vbc 900 chu loneitute bank account-ah dahsak a ni tawh a ni, a ti.

Minister chuan lo neih chu state economy tana pawimawh a ni tih tarlangin, lo neih aṭanga sum lak luh 46% chu chhiah atan chhun luh a ni tawh tih a sawi. Tourism leh sumdawnna ṭangkawp chuan 41% an chhung lut tawh a, a bak 13% chu industry aṭanga chhun luh a ni bawk.

Nath chuan state-a loneituten serthlum quality ṭha, thei, purun leh alu an thar nasa tih a sawi. District hrang hrangah serthlum chin uar belh zel a ni tih a sawi bawk. SDG performance-ah state 17 an khum tawh tih tarlangin, BJP rorelna hnuaiah an thawhrim rah chu ram pum huapa hriatpui an ni tawh a, NITI Aayog pawhin state hlawhtlinna chu a lawmpui hle a ni, a ti.