Nagaland rehab center-a thawk mi 5 man

Nagaland-a Dimapur police-te chuan Chekiye khuaa rehabilitation centre-a Assam mipa pakhat, kum 46 thih chungchangah thawktu mi panga an man a, an man zingah hian centre neitu pawh a tel.

Mitthi hi Golaghat district-a Ganeshpuri, Aojan-a cheng Pradeep Basumatary a ni a, a taksaah hliam eng emaw zat hmuh niin, a thih hmain beih a tawk a nih an rin thu police-te chuan an sawi. Official-te chuan he thil thleng hi Nilaini chawhnu dar thum velah Referral Hospital aṭangin Diphuphar Police Station-ah hriattir a nih thu an sawi.

Police team-te chu damdawi-inah hian rang taka kal nghalin, doctor-in Basumatary thih an puan lai pawhin an awm a, officer-te chuan FIR ziak lutin an chhuizui nghal a ni. Investigator-te chuan Basumatary taksaah hliam eng emaw zat an hmu chhuak a ni. A ruang hi Dimapur district damdawi-inah post-mortem tura lak a ni.

Chhuizuina kalzelah police-te chuan rehab centre staff pali, pawikhawihnaa inhnamhnawih ni ngeia rinte leh centre neitu an man. Official-te chuan chhuina aṭanga a landanin, mi eng emaw zat an la man belh dawn tih an sawi. Pawikhawihna thleng an chhui rualin, thuneitute chuan rehabilitation center chu a hranpaa chhui chianna an nei tawh bawk. Team-te chuan licence, centre inrelbawlna, leh centre-a awm mekte damdawi lama an enkawl dan leh rilru hriselna tura an enkawl dante an enfiah dawn a ni.