Tripura : Directorate of Skill Development-in IIT Delhi leh Tata IIS inremna ziahpui

Tripura-a ṭhalaite tana hnathawh tur siam a, eizawnna ngelnghet an neih theihna tura hmalakna atan Directorate of Skill Development chuan IIT Delhi leh Tata IIS-te chu Memoranda of Understanding (MoU) a ziahpui. Inremna an siam hmang hian ṭhalai 1,000 chu hna an hmuh theihna turin training pek an ni ang.

MoU hnuaiah hian IIT Delhi chuan state institution-te thawhpuiin, candidate 500 hnenah training a pe dawn a, chung zingah chuan Artificial Intelligence, Machine Learning, Internet of Things, Blockchain leh 5G technology te pawh a tel. Programme hi NIELIT Agartala, Tripura Institute of Technology leh sorkar puihna nen ṭangkawpa kalpui a ni ang. He hmalakna hi Pradhan Mantri Kaushal Vikas Yojana (PMKVY) 4.0 leh state-in a thlawp, Mukhya Mantri Dakyatha Unnyanan Prakalpa (MMDUP) aṭanga sum thawhkhawm hmanga kalpui a ni dawn a ni.

Tata IIS nen MoU an ziah hmangin, Industrial Automation Safety Engineering, Industrial Robotics System Integration, Electric Vehicle Maintenance, CNC Programming leh 3D Printing Operations-ah candidate 500 dang training pek an ni bawk ang. Course hrang hrangte hi Tripura-a Industrial Training Institute (ITI) nen ṭangkawpa kalpui tur a ni. Tata IIS chief financial officer Mayank Palan chuan, training hi hna lakna nen a inzawm tih sawiin, candidate hlawhtlingte chu ram puma Tata manufacturing unit leh a thawhpui industry hnuaiah an thawk thei dawn tih a sawi.